News
Ann 2025
Conzert d’aisciöda 2025
Articul por le “Sföi de informaziun dl comun de San Martin de Tor”
Armonies d’aisciöda: la Musiga da San Martin incantëia le publich
En sabeda ai 17 de ma á la Musiga da San Martin de Tor albü l’onur da porté dant melodies tradizionales y modernes, plënes de emoziuns, dan da la jënt dla comunité. Deplü onoranzes é gnüdes surandades y bëgn 8 mëmbri nüs é gnüs presentá.
Tröpes proes, le gran impëgn y dediziun da pert dles musicontres y di musicontri á fat garaté le conzert tradizional d’aisciöda, sot ala direziun dla dirighënta Katrin Zingerle. Al publich ti él gnü ofrí na sëra rica de melodies, entusiasm y soris. Le salf dles manifestaziuns se á implí de calur y musiga.
Reconescimënc por la dediziun: premiá por 10 y 15 agn de ativité
Do la pröma pert dl conzert él gnü surandé les onoranzes sciöche rengraziamënt dl gran impëgn y dl tëmp dediché ala musiga. Chisc diploms ne desmostra nia ma la gran dediziun individuala, mo ai sotrissëia ince le valur dla continuité y dla coejiun al grup.
Por 10 agn de ativité á podü pié do l’onoranza bëgn cater mëmbri de nosta uniun: Oliver Castlunger che sona la posauna, ala bateria Damian Clara, al corn tenor Tobias Turnaretscher y la clarinetista Natalie Gasser.
La medaia de mirit de brom por i 15 agn de ativité é gnüda surandada ai dui jormans da Lungiarü Cindy Costa al clarinet y le baterist James Moling.
A düc i onorá ti vá n gran dilan por so contribut y l’audanza por le dagní de tröc agn de ligrëza y pasciun pro nosta musiga.
Energies nöies: n arichimënt por nosta musiga
Nosc conzert ne á nia ma incundé la bela sajun, mo é ince sté n avenimënt por presenté i mëmbri nüs de nosta musiga. Set talënc jogn – la fablotista Noemi Costa y al oboa Ellen Daporta da Lungiarü, la clarinetista Karolin Zingerle, Emily Zingerle al saxofon, al corn tenor Armin Dasser, Samuel Zingerle al corn y la marcadëntra Alexia Winkler, düc da San Martin – á albü en sabeda so debüt ufizial, portan freschëza y vitalité a nosc grup.
Gnüda zoruch, do na cörta palsa, é la musicontra da San Martin Tanja Graffonara al fabló de travers.
Bel él da odëi che jones y jogn á ligrëza y pasciun da gní a fá pert de nosta uniun. A düc ti audunse porchël tröpa ligrëza y sodesfaziun y n dagní plëgn de beles emoziuns pro nosta musiga.
N dilan che vel plü de mile notes
Le plü gran dilan vá sambëgn a düc os che sëis gnüs a se ascuté sö: ci foss pa na musiga zënza so publich!
Por che al garetes n bel conzert d’aisciöda val debojëgn dl’aiüt de tröpes porsones. N rengraziamënt particolar ti vá a nosta dirighënta Katrin che á investí tröp de so tëmp lëde por nosta uniun. N gran dilan por tüa dediziun, ambiziun y pasciun por la musiga. N bel gran dilan ince a nosc presidënt Ivo Clara y a döt le consëi por le laur y la gran organisaziun. N rengraziamënt de cör ti va ince ales döes moderadësses, Daniela y Teresa, che se á condüt fora por le conzert cun simpatia y profescionalité. Rengraziun ince le comun da San Martin che se mët tres indô a desposiziun la palestra y se dá n sostëgn finanziar, al’Uniun dl Teater por la paladina, al fotograf Daniel Schanung, a Hubert Pezzei che se crüzia dla tecnica, ai stödafüch por le sorvisc, ala “Laurin Stiftung” por so sostëgn finanziar, ala Cassa Raiffeisen Val Badia che se á daidé da curí i cosć dla stamparia y ala Provinzia Autonoma da Balsan repartiziun consulta culturala ladina cun a ce Daniel Alfreider che se dá na man cun i finanziamënc. N gran dilan ince a düc i benefaturs de nosta uniun che ia por l’ann se dëida sostigní a val’manira nosta ativité. Rengraziun ince chi che se ofrësc le contribut dl 5 promile – ai se dëida cotan. Nia inultima ti vál n dilan a vigni musicontra y musiconter por la lezitënza y le gran impëgn ti ultims mëisc.
Chësc conzert se á scinché de bi momënc y recorc: bel dilan a düc canc!
N’odlada al dagní: la Musiga ne stá nia chita
L’ativité de chësc ann á pormó metü man por la Musiga da San Martin y se confortun ai tröc termins che un fora por l’isté y altonn.
Do na picia palsa vara inant cun les festes da dlijia: les döes prozesciuns dles Antles y Festa dl Cör de Gejú. En chësc ann fajarunse ince n conzert da sëra sö dal Ciastel de Tor, en valgügn conzerc fora por l’isté ti trëi paisc dl comun y n conzert da sëra a Sëlva. Inant vara spo de agost en Santa Maria dal ciüf cun la defilada y n conzert a La Ila y plü inant n conzert da sëra a Al Plan. De setëmber sonunse dala Festa di sorvisc soziosanitars a San Martin y en gaujiun dla Festa por i 50 agn di stödafüch a Antermëia. Sciöche bele ti agn passá fajunse para dala defilada por le “Traubenfest” a Maran. Stlujun jö l’ann de ativité cun Gnissant y la Festa por i 50 agn dl’Uniun Musighes Val Badia a Corvara.
Se confortun da se odëi! I se aspetun cun ligrëza!
A se odëi fora por l’ann cun la Musiga da San Martin! Viva la Musiga!
Articul por la “Usc di Ladins”
Aisciöda en festa cun la Musiga da San Martin de Tor
N’esplojiun de musiga, emoziuns y talënc nüs sön paladina: aplausc da sentimënt por les musicontres y por i musicontri
En sabeda ai 17 de ma ti á de la Musiga da San Martin le bëgngnü al’aisciöda cun n conzert plëgn de emoziuns. Sot ala bachëta dla dirighënta Katrin Zingerle á les musicontres y i musicontri ofrí al publich na sëra rica de melodies, entusiasm y soris. Le salf dles manifestaziuns se á implí de calur y musiga.
Dal’energia de Centuria ala poesia de The Prayer: emoziuns tla musiga
La Musiga ti á dé le bëgngnü al publich cun le marsc “Sempre Unita”, n toch musical che descrí l’Europa unida. Tla composiziun tradizionala de Michael Geisler él gnü alzé fora n bel solo dla tuba, eufonium y oboa. La proscima ciantia é stada “Centuria” dl componist american James Swearingen, conesciü por süa musiga scëmpla y valgamia saurida da soné. Inant era spo jüda cun “Nora – Licht des Nordens”, composiziun che porta l’inom dla iata dl componist Thomas Asanger, che é morta al eté de bëgn 20 agn. Cun chësta composiziun dër plajora baia le componist austriach dal cör de düc chi che arichësc süa vita y chëra de süa familia cun tiers da cater iames. La musiga á stlüt jö la pröma pert cun n toch che á descedé gran emoziuns: “The prayer”. Le duet danter la canadeja Celine Dion y le gran tenor talian Andrea Bocelli á tres ciamó n grandiscimo suzes. La solista ala trombëta, Lucia, á metü man chësta oraziun y é spo gnüda acompagnada da Maicol tl duet. Ai se á uní spo cun la musiga intiera por ti dé pëis ales parores plü importantes dl’oraziun: “Somiun n monn zënza violënza, n monn de pesc y iustizia. Che vignun ti dais la man a so vijin sciöche simbol de pesc y fraternité. Ciara jö sön nos, che vignun ciafes amur, amur incër ël ia y te ël.”
Reconescimënc por la dediziun: premiá por 10 y 15 agn de ativité
Do la pröma pert dl conzert él gnü surandé les onoranzes sciöche rengraziamënt dl gran impëgn y dl tëmp dediché ala musiga. Chisc diploms ne desmostra nia ma la gran dediziun individuala, mo ai sotrissëia ince le valur dla continuité y dla coejiun al grup.
Por 10 agn de ativité á podü pié do l’onoranza bëgn cater mëmbri de nosta uniun: Oliver Castlunger che sona la posauna, ala bateria Damian Clara, al corn tenor Tobias Turnaretscher y la clarinetista Natalie Gasser.
La medaia de mirit de brom por i 15 agn de ativité é gnüda surandada ai dui jormans da Lungiarü Cindy Costa al clarinet y le baterist James Moling.
A düc i onorá ti vá n gran dilan por so contribut y l’audanza por le dagní de tröc agn de ligrëza y pasciun pro nosta musiga.
Energies nöies: n arichimënt por nosta musiga
Nosc conzert ne á nia ma incundé la bela sajun, mo é ince sté n avenimënt por presenté i mëmbri nüs de nosta musiga. Set talënc jogn – la fablotista Noemi Costa y al oboa Ellen Daporta da Lungiarü, la clarinetista Karolin Zingerle, Emily Zingerle al saxofon, al corn tenor Armin Dasser, Samuel Zingerle al corn y la marcadëntra Alexia Winkler, düc da San Martin – á albü en sabeda so debüt ufizial, portan freschëza y vitalité a nosc grup.
Gnüda zoruch, do na cörta palsa, é la musicontra da San Martin Tanja Graffonara al fabló de travers.
Bel él da odëi che jones y jogn á ligrëza y pasciun da gní a fá pert de nosta uniun. A düc ti audunse porchël tröpa ligrëza y sodesfaziun y n dagní plëgn de beles emoziuns pro nosta musiga.
Ritm, energia y gran emoziuns: la musiga concuistëia cun i suzesc dl pop y dl rock
Do les onoranzes y la presentaziun di mëmbri nüs, á la musiga porté dant la polca de Zdenek Gursky por corn tenor y bariton, dal titul “Tequila”, soné dai dui solisć Simon y Marco. Inant era jüda cun melodies modernes y conesciüdes; n’aria da film che se á lié cun chëra da sinfonia, chësc á Bert Appermont creé te süa composiziun “Coldplay in Symphony”. An á podü aldí 4 cianties plënes de emoziuns: “Sky Full of Stars”, “Clocks”, “The Scientist” y “Viva La Vida”, ciantia che trascmët n messaje sot: “Le tëmp passa, dedichesse ales gran emoziuns dl cör y viede la vita al mascim.” Ci che á dër plajü é sté le medley “The Best of Queen” arr. da Paul Murtha, soné adöm a nosta “Fesche Jugend”, ales mitans y ai mituns dla scora de musiga. Danter chisc él Clara Alexa y Pedevilla Federica al fabló traversal, Clara Alissa y Graffonara Giulia al saxofon, Clara Armin ala bateria, Tavella Cecilia al fagot, Tavella Tobia al corn tenor, Tolpeit Lena al corn y Zingerle Greta al clarinet. Le conzert é gnü stlüt jö dal toch ritmich “Flashdance... what a feeling” dl componist da Gherdëna Giorgio Moroder, conesciü sciöche pere dla musiga da discoteca. Süa ciantia “Flashdance” é öna dles cianties che toca pro i films da bal plü conesciüda di agn ’80 y premiada cun n Oscar tl ann 1984.
Reconescënza y colaboraziun: les porsones che porta al garaté de döt chësc
Le plü gran dilan vá sambëgn a düc os che sëis gnüs a se ascuté sö: ci foss pa na musiga zënza so publich!
Por che al garetes n bel conzert d’aisciöda val debojëgn dl’aiüt de tröpes porsones. N rengraziamënt particolar ti vá a nosta dirighënta Katrin che á investí tröp de so tëmp lëde por nosta uniun. N gran dilan por tüa dediziun, ambiziun y pasciun por la musiga. N bel gran dilan ince a nosc presidënt Ivo Clara y a döt le consëi por le laur y la gran organisaziun. N rengraziamënt de cör ti va ince ales döes moderadësses, Daniela y Teresa, che se á condüt fora por le conzert cun simpatia y profescionalité. Rengraziun ince le comun da San Martin che se mët tres indô a desposiziun la palestra y se dá n sostëgn finanziar, al’Uniun dl Teater por la paladina, al fotograf Daniel Schanung, a Hubert Pezzei che se crüzia dla tecnica, ai stödafüch por le sorvisc, ala “Laurin Stiftung” por so sostëgn finanziar, ala Cassa Raiffeisen Val Badia che se á daidé da curí i cosć dla stamparia y ala Provinzia Autonoma da Balsan repartiziun consulta culturala ladina cun a ce Daniel Alfreider che se dá na man cun i finanziamënc. N gran dilan ince a düc i benefaturs de nosta uniun che ia por l’ann se dëida sostigní a val’manira nosta ativité. Rengraziun ince chi che se ofrësc le contribut dl 5 promile – ai se dëida cotan. Nia inultima ti vál n dilan a vigni musicontra y musiconter por la lezitënza y le gran impëgn ti ultims mëisc.
Chësc conzert se á scinché de bi momënc y recorc: bel dilan a düc canc!
A s’odëi fora por l’isté! Viva la musiga!
Por la Musiga da San Martin
Jasmin Clara
La Musiga da San Martin de Tor á le plajëi da ves invié a so Conzert d' Aisciöda.
Die Musikkapelle St. Martin in Thurn freut sich Sie zum heurigen Frühjahrskonzert einzuladen.
La Banda Musicale di San Martino in Badia è lieta di invitarvi al suo Concerto di Primavera.
Ves aspetun cun gran ligrëza!
Ann 2024
Articul por le “Sföi de informaziun dl comun de San Martin de Tor”
N ann plëgn de musiga y tëmp da sté adöm
La Musiga da San Martin de Tor ciara zoruch a n ann rich de avenimënc – da conzerc, a festes fina a ativités por promöie le sté adöm, che á arichí la vita culturala dl comun.
Pröma pert dl’ann
Do na palsa miritada unse metü man les proes ai 20 de jená cun gran motivaziun y ligrëza. De forá s’l’unse spo ciamó n iade lasciada jí buna y sun stá n pü’en compagnia: a tëmp de löna sunse jüs cun la liösa dala “Pertinger Alm” a Terenten. Iló unse ciafé na buna cëna y dedô unse fat n bel rait cun la liösa.
Sun jüs inant cun les proes y val’öna é stada bindebó interessanta; ai 2 de aurí unse albü le dirighënt Sigisbert Mutschlechner cun nos; cun so savëi y cun val’consëi unse imparé tröp lapró. Finamai la Rai unse albü cun nos: la jornalista Jasmin Ferdigg é stada a se ascuté sö y a intervisté nosta dirighënta.
Ince en chësc ann unse abelí les festes de dlijia de nosc comun: Pröma Santa Comuniun a San Martin ai 14 de aurí y Pröma Santa Comuniun a Antermëia ai 21 de aurí.
Nosta dirighënta nöia, Katrin Zingerle, á salpü da se motivé y da se condüje fora por l’invern cun gran dediziun y impëgn. Insciö ênse bun arjigná ca por le conzert d’aisciöda che un fat ai 5 de ma. Odëi n salf plëgn de jënt se á fat dër plajëi a düc nos.
De ma á döta la musiga tut pert a döes sopoltöres: ai 17 de ma sopoltöra de Maria Dapoz, uma y lâ de n valgügn de nüsc musicontri, y ai 25 de ma sopoltöra de Anna Frenes, fomena de nosc portabandira.
L’ultima domënia de ma unse ciamó soné dala Pröma Santa Comuniun a Lungiarü.
De jügn éra spo jüda inant cun döes festes de dlijia y n conzert: 2 de jügn Festa dles Antles a Lungiarü, 9 de jügn Sacro Cör de Gejú a San Martin. Atira do la festa dl Sacro Cör sunse jüs inant a San Sciomun, olache un fat n conzert.
Ativité fora por l’isté
Ai 14 de messé unse fat dui conzerc: danmisdé unse soné val’toch ales mëdes y ai berbesc dla Ciasa de Palsa; chësc ti á fat sambëgn dër plajëi. Do marëna unse spo fat n conzert a Antermëia en gaujiun dla Segra dl paisc.
Fora por l’isté él indöt gnü fat 5 conzerc da sëra: dui sön le paiun a San Martin (un de chisc adöm al grup dl Bal Popolar), un a Lungiarü, un a Antermëia y un a San Ciascian. En chësc ann sunse ince gnüs inviá da jí a soné tratan la Festa Alaleria sö a Corvara.
Ala fin de messé él gnü organisé na griliada a Lungiarü por dötes les mëmbres y i mëmbri dla musiga; al fej tres indô bun passé val’ora adöm a s’la cunté y a s’la rí: chësc dëida crësc adöm na uniun.
Ai 14 y 15 de agost él spo la musiga che á organisé la Festa Alaleria a San Martin.
Un stlüt ia l’ativité da d’isté cun la defilada a Cianacëi tratan la Festa da d’Istá.
Ativité dles jones y di jogn
Al é indô gnü metü sö na musiga di jogn a livel de döta la valada, olache al é gnü fat n valgügn conzerc fora por l’isté. Por le pröm iade él ince gnü metü a jí le proiet “Val Badia Youth Wind Band” por musicontres y musiconc dal livel de brom insö, olache al é gnü soné musiga da film y fora de musicals. Le de dla porta daverta é gnü organisé adöm ala scora de musiga a Al Plan, por dötes les musighes dla bassa Val Badia.
Cun gran ligrëza an podü tó sö trëi medaies nöies pro nosta musiga. Moritz Erlacher á arjunt la medaia de brom ala posauna, Valentina Mischí la medaia de arjënt al corn y la clarinetista Anna Ferdigg la medaia d’or. N gran complimënt por chësc travert y inant tröpa ligrëza pro la musiga!
Dui dis de jita a Trieste y Koper
Pro na uniun alda sambëgn ince la compagnia y le sté adöm. Insciö á la musiga fat la jita de dui dis a Trieste y tla Slovenia a Koper, dai 14 ai 15 de setëmber cun n bel program.
Le pröm de sunse naota jüs a ti ciaré ala Grotta Gigante, che á dër plajü. Do marëna unse spo albü l’ocajiun da podëi vijité la bela cité de Trieste. Do avëi imparé tröpes cosses nöies sura chësc bel post, unse albü val’ora de aurela cörta. Da sëra ia sunse spo rová a Koper tla Slovenia, olache sun stá fina la domënia domisdé, canche sun spo piá zoruch cuntra ciasa.
Prësc düc i mëmbri á tut sö l’invit y al é sté na gran partezipaziun, an se á dé na hetz y s’l’un godüda. Na jita nia da se desmentié!
Altonn
Ai 10 de otober sunse jüs por le pröm iade sön la Munt de Suc a fá na picia defilada y n conzert en gaujiun dla Festa dla menada de munt.
Sciöche da tradiziun unse ince en chësc ann soné da Gnissant tla cortina da San Martin les cianties “Näher mein Gott zu dir”, “So nimm denn meine Hände“ y „Ich hatt einen Kamerad“.
L’ann de ativité dla musiga se á stlüt jö ai 30 de novëmber cun la sentada generala, olache al é ince gnü lité da nü le consëi, che á ma albü de pici mudamënc. Un rové ia la sëra cun le rorate por la Uniun dla Musiga soné da n valgügn musicontri y dedô cëna y n valgönes ores por sté en compagnia.
Al é indô sté n ann plëgn de emoziuns, de esperiënzes nöies y stlujun jö chësc ann de ativité cun sodesfaziun y motivaziun da jí inant tl’ann nü.
N lalt y n gran dilan a nosta dirighënta Kathrin, por süa ambiziun, so impëgn y por la lezitënza y dediziun, al presidënt Ivo y döt le comité por l’organisaziun y la buna colaboraziun y sambëgn a düc i mëmbri dla musiga.
Dilan ince a düc chi che sostëgn dagnora la musiga cun le 5‰.
A s’odëi fora por l’ann 2025! Viva la musiga!
Jasmin Clara
por la Musiga da San Martin
Conzert d’Aisciöda 2024
Articul por le “Sföi de informaziun dl comun de San Martin de Tor”
Gran ligrëza y pasciun á porté al garaté dl conzert d’aisciöda dla Musiga da San Martin
Musiconc apascioná y n salf plëgn de amanc dla musiga – chëstes é les dërtes condiziuns por n conzert rich de suzes.
En domënia ai 5 de ma á la Musiga da San Martin de Tor albü l’onur da porté dant so conzert d’aisciöda dan da n salf plëgn de jënt. Tan n gröm de jënt al conzert d’aisciöda? Pu ci él pa sozedü? Ligrëza por la musiga, coriosité, familia y amizizies á fat a na moda che le salf da San Martin se á implí bele na mesora denant che le conzert metess man. Chësc á fat sambëgn dër plajëi a dötes les musicontres y ai musiconc. Sot ala bachëta dla dirighënta nöia Katrin Zingerle se á i mëmbri dla musiga bele da deplü mëisc arjigné ca por chësc avenimënt. Le gran impëgn y la ligrëza de düc canc á fat garaté n bel conzert che á dër plajü al publich.
foto Daniel Schanung
Onoranzes
Propi n pü’capazi sunse nos düc dla musiga, deache ince en chësc ann un indô podü partí fora de plü onoranzes, sciöche sëgn de rengraziamënt por le gran impëgn y por le tëmp dediché a chësta uniun.
Cin’jones á podü pié do l’onoranza por 10 agn de ativité pro la musiga: la jona da Lungiarü Jessica Dapoz che sona nia ma un n stromënt, mo bëgn trëi: le fagot, le fabló traversal y da chësc ann ince la trumba, la musicontra Silvia Graffonara da San Martin che sona le clarinet, les fablotistes Teresa Planatscher y Marina Rubatscher y inultima Arianne Schanung cun l’oboa.
foto Daniel Schanung
da man ciampa: le presidënt Ivo Clara, Jessica Dapoz, Marina Rubatscher, Teresa Planatscher, Arianne Schanung y la dirighënta Katrin Zingerle
N’onoranza n pü’plü pesocia ti é gnüda partida fora a nosc portabandira Reinhold Pescoller, che á naota soné le corn por bëgn 38 agn y fej sëgn pert di portabandires. A Reinhold ti él gnü surandé la medaia de mirit d’or por i 40 agn al sorvisc de chësta uniun.
foto Daniel Schanung
da man ciampa: Heinz Canins, Walter Stirner, Katrin Zingerle, Reinhold Pescoller y Ivo Clara
Tröpes é stades les emoziuns canche al é gnü partí fora l’ultima onoranza. Chësta é stada n’onoranza en pü’particolara; ara ti é gnüda surandada al vedl dirighënt Sepl Pezzei, che é gnü nominé dirighënt d’onur por so contribut musical y coleghial che al á dé cun cör ala Uniun dla Musiga te sü 30 agn de ativité da dirighënt.
foto Daniel Schanung
Ai onorá ti él gnü dediché la marcia Crans Montana de Siegfried Rundel por ti dí n gran dilan y por ti audé inant tröpa ligrëza y pasciun cun la musiga.
Mëmbri nüs pro la musiga
Al é tres indô bel da odëi che tröc jogn y jones á ligrëza da gní pro nosta uniun. Chësc ann á la musiga podü tó sö cin’mëmbri nüs: dui musiconc y trëi marcadëntres. La jona da Lungiarü, Christa Clara, l’á vagada da gní a soné le clarinet y Moritz Erlacher da Antermëia é gnü a soné la posauna. Les trëi marcadëntres é dötes da San Martin de Tor: Aylin Costabiei, Sara Ferdigg y Anna Planker.
A düc canc ti audunse tröpa ligrëza y sodesfaziun y ti dijun n bel dilan por le sorvisc che ai fajará pro la musiga.
Rengraziamënc
La Musiga da San Martin oress fá en valgügn rengraziamënc a chi che á daidé pro che al garetes n bel conzert d’aisciöda. N rengraziamënt particolar ti vá ala dirighënta Katrin che á investí tröpes forzes por chirí fora les composiziuns y por insigné ite le program. Dilan de tüa dediziun por la musiga. N bel gran dilan ince a nosc presidënt Ivo Clara y a döt le consëi por le laur y la gran organisaziun. N bel dilan ince ala Daniela che se crüzia ann por ann da se arjigné ca na bela presentaziun pro i conzerc. Rengraziun ince le comun da San Martin che se mët a desposiziun la palestra y se dá n sostëgn finanziar, al’Uniun dl Teater por la paladina, al fotograf Daniel Schanung, a Hubert Pezzei che se crüzia dla tecnica, ai stödafüch por le sorvisc, ala “Laurin Stiftung” por so sostëgn finanziar, ala Cassa Raiffeisen Val Badia che se á daidé da curí i cosć dla stamparia y ala Provinzia Autonoma da Balsan repartiziun consulta culturala ladina cun a ce Daniel Alfreider che se dá na man cun i finanziamënc. N gran dilan ince a düc i benefaturs de nosta uniun che ia por l’ann se dëida sostigní a val’manira nosta ativité. Rengraziun ince chi che se ofrësc le contribut dl 5 promile – ai se dëida cotan. Y a os düc che sëis gnüs a se ascuté sö: ci foss pa na musiga zënza publich!
Co vara pa inant cun la Musiga?
Do na picia palsa vá la musiga bele inant cun l’ativité fora por l’ann: la Pröma Santa Comuniun a Lungiarü, les döes prozesciuns dles Antles y Festa dl Cör de Gejú, n conzert a San Sciomun, n conzert ite dala ciasa de palsa, Segra d’Antermëia, en valgügn conzerc fora por l’isté ti trëi paisc, n conzert a San Ciascian, conzert a Corvara tratan la Festa alaleria, na defilada dala Gran Festa da d’Instá a Cianacëi, na defilada y n conzert a Ciastel y sambëgn na bela jita cun i scioldi dl comun 😉.
A se odëi fora por l’isté cun la Musiga da San Martin! Viva la Musiga!
Jasmin Clara por la Musiga da San Martin de Tor
foto Freddy Planinschek
La Musiga da San Martin de Tor á le plajëi da ves invié a so Conzert d' Aisciöda.
Die Musikkapelle St. Martin in Thurn freut sich Sie zum heurigen Frühjahrskonzert einzuladen.
La Banda Musicale di San Martino in Badia è lieta di invitarvi al suo Concerto di Primavera.
Ves aspetun cun gran ligrëza!
Katrin Zingerle schwingt ab sofort den Taktstock
Nach 30 Jahren übergibt Sepl Pezzei den Taktstock der Musikkapelle St. Martin in Thurn
1993 übernahm Sepl Pezzei die Musikkapelle Sankt Martin in Thurn, welcher für großartige 30 Jahre am Dirigentenpult stand. Während dieser Zeit hat er Leben in die Musikkapelle hineingebracht, die Freude für das Spielen geweckt und war immer im Stande Jung und Alt zu motivieren. Wir wünschen ihm alles Gute auf seinem weiteren Weg!
Ab jetzt wird die junge, motivierte und musikalisch engagierte Katrin Zingerle den Taktstock schwingen. In den letzten Jahren hat sie in unserer Kapelle Querflöte gespielt und war auch im Vorstand als Chronistin tätig.
Im letzten Jahr hat sie angefangen, sich auf diesen Posten vorzubereiten. Nachdem sie im Winter den Grundkurs für Stabführer gemacht hat, hat sie im Juni den Aufbaukurs mit Bravour abgeschlossen und dann im September die 3-jährige Kapellmeisterausbildung bei Sigisbert Mutschlechner angefangen.
Zu ihrem neuen Lebensabschnitt sagt sie: „Ich freue mich sehr auf diese neue Herausforderung. Mein Ziel ist es, den Musikantinnen und Musikanten meine Freude und Leidenschaft für die Musik weiterzugeben, sie zu begeistern und zu motivieren, sodass sie beim Spielen ihre Gefühle und Emotionen ausdrücken können. Sehr wichtig sind mir die Gemeinschaft im Verein, eine gute Atmosphäre und gegenseitiger Respekt. Nur gemeinsam kommt man ans Ziel. Wenn dies vorhanden ist, kann man gut musizieren und somit die Herzen des Publikums berühren!“ Somit wünschen wir ihr viel Glück, Freude und Geduld bei ihrer neuen musikalischen Reise.
“Taktwechsel” pro nosta musiga
Cun ligrëza se fajunse alsavëi che pro nosta musiga sarál na mudaziun emozionanta tl ann nü 2024.
Do che Sepl Pezzei á por bëgn 30 agn condüt nosta musiga cun gran pasciun y ardimënt fora por alc y basc, surantol sëgn Katrin Zingerle la bachëta da dirighënta.
A Sepl ciamó n gran dilan por döt ci che al á fat por la musiga da San Martin de Tor y a te, Katrin, döt le bun por chësta nöia pert de tüa vita.
🍀🍀🍀 Toi, toi, toi y viva la musiga! 🍀🍀🍀
